الإزدواج

بس عشان يعني اتخنقت ومش لاقيه حاجه ابدأ بيها البوست عدل
ليه احنا متناقضين ونظرتنا مزدوجه
الراجل يدخن براحته ،الست لو دخنت تبقي مش محترمه!
الراجل براحته يمشي مع بنات ويصاحب ويقطع السمكه وديلها
البنت لو حد شافها مع ولد يقولوا عليها مش كويسه
الراجل ولا الولد يسهر لحد الفجر بره إنشاله حتي كان واقف ع الناصيه يعاكس ف البنات ولا يشرب حشيش
البنت لو رجعت البيت الساعه 10 ولا 11 تبقي مش كويسه حتي لو راجعه من شغل
الراجل لو طلق مره واتنين وعشره عادي الراجل ميعيبهوش غير جيبه
الست لو اتطلقت تبقي هي اللي غلطانه حتي لو اللي طلقها ده فيه عبر الدنيا كلها
ليه بنعمل ف نفسنا كده
ليه بنفكر بالطريقه دي
انا تعبت بجد
نفسي اطفش م البلد دي ومرجعهاش تاني ابدا

أطفال أطفال

مبدئيا يعني كلنا اكيد بنحب الاطفال
انا بحب الاطفال اكتر من اي حد شفته
هتقولوا كل البنات كده هقولكو لأ مانا بشوف بنات برضو
انا لو رحت زرت حد وشفت اطفال عندهم هسيب الكبار واللي من سني وهقعد ألعب مع الأطفال
الغريب ان ممكن الاطفال دول يبقو خوافين بس بيقعدو يلعبو معايا (أكيد حاسين اني طفله زيهم)
معظم الناس تشوف ده غلط
لا عيب يابنتي انتي كبيرة لازم تبقي مخك كبير مش عقلك عقل عيال
يابنتي اكبري انتي علي وش جواز الناس تقول عليكي ايه
كده مش هترعفي تربي عيالك هتدلعيهم زياده عن اللزوم
غير كده بقا بحب كل حاجه متعلقة بيهم
بحب اتفرج علي لبس الأطفال اوي
بحب اتفرج علي الكارتون
والكارتون ده لوحده حكايه تانيه هنبقي نتكلم فيها بعدين
بحب اوي أكل اكل الاطفال(وش برئ او عبيط يعني مش هتفرق)
ده يسموه ايه بقا
عقده العوده الي الطفوله؟!
بالمناسبه النهارده عيد الطفوله
احتفلتو بعيد الطفوله ولا لا؟

يبقي انت اكيد اكيد ف مصر

نفسي أسأل سؤال
ليه ف الاغنيه دي اكيد اكيييييييييييد
بتأكدو علي ايه بس
المفروض تقولوا
لما تستني مواصله ساعتين عشان تروح بيتكو وف الاخر لما تلاقي حاجه تركبها تلاقيها زي علبه السردين
يبقي انت اكيد اكيد ف مصر
لما تطلع عينك ف التدوير علي شغل ومتلاقيش وتدخل اي شغل ف قطاع خاص بالواشطه ويطلعو عينك ويعصروك عشان يدوك ف الاخر 150 جنيه
يبقي انت اكيد اكيد ف مصر
لما تقعد تدرس ف حاجات ملهاش لزمة عشان يبقي اسمك معاك شهاده جامعه وكده كده مش هتشتغل ده يمكن اللي معاه معهد او دبلوم هيشتغل وانت لا
يبقي انت اكيد اكيد ف مصر
لمايبقي همك كله علي كلام الناس مش انت عملت ايه ولا اتقدمت ولا لأ ولا ربنا راضي عنك ولا لا
يبقي انت اكيد اكيد ف مصر
لما أحمد عز (بتاع حديد عز مش الممثل) يبقي عنده شقه ب20 مليون ومراته الجديده (الرابعه) شاهيناز النجار عندها شقه ب 15 مليون ويروحو يشترو فيلا ب40 مليون عشان تبقي عش الزوجيه السعيد(الهي يولع بيكو قولوا امين)
يبقي انت اكيد اكيد ف مصر
لما تمشي ف الشارع تلاقي الناس بتكلم نفسها م الهم اللي عايشين فيه
لما كل حاجه ف حياتك متتحلش غير بالفلوس والرشوة
يبقي انت اكيد اكيد ف مصر
لما يبقي شعار الحزب الوطني ان مصر بتتقدم بينا وهي بتتقدم بيهم هما بس
يبقي انت اكيد اكيد ف مصر
لما يبقي البشر مطحونين وطالع عين اهلهم ومش قادرين يتكلمو
يبقي انت اكيد اكيد ف مصر
لما تلاقي ناس مقهورة وبدل ماتثور تقعد تقول ف نكت(ماحنا اصلنا ولاد نكته)
يبقي انت اكيد اكيد ف مصر
لما الشباب يهاجرو ويسيبولهم البلد(مش ده اللي انتو عاوزينه) وبرضو ميدوهمش فرصه
يبقي انت اكيد اكيد ف مصر
لما الواحد يبقي نفسه يسيب البلد وميرجعش لها تاني ابدا
يبقي احنا اكيد اكيد ف مصر
وفعلا مصطفي كامل مكنش عنده اي حق لما قال "لو لم أكن مصريا لوددت أن اكون مصريا"
أنا لو مكانه هقول
لو لم اكن مصرية لوددت ان اكون اي حاجه ف الدنيا الا مصرية