....

.........

لما تحس انك ولا حاجه !
او تحس انك مهما قلت محدش حاسس بيك
او تبقي محتاج حد ومحدش حاسس ..
ولو قلت انا محتاج حد محدش يعبرك
ولو عيطت وصرخت وضربت برجليك في الارض وخبطت راسك في الحيطه
محدش حتي هيقولك طظ
يبقي تقول لنفسك بقا طظ

nOtHiNg

وحيده

وحيده .. بمعني الكلمه
مش عارفه العيب فين .. عندي ولا عند الناس
من زمان وانا دايما ببقي لوحدي .. في البيت .. في المدرسه .. عند قرايبنا
معرفش ليه مبعرفش اروح اتكلم مع حد .. مبعرفش ابتدي حوار او اقرب من حد
عمري ما كان ليا صاحبه انتيم زي كل البنات اللي ليهم دايما صاحبة قريبه منهم بيحكوا معاها كل حاجه
عمري ما كان عندي الصاحبه دي اللي اقدر اكلمها براحتي
مبقولش معنديش صحاب .. لأ عندي صحاب و فيه منهم قريبين مني أوي
بس عمري مابقدر اروح احكي مع حد منهم لوحدي
معرفش ليه فعلا ..
بس مفتقده اوي احساس ان حد يبقي معايا .. حد يبقي حاسس اني لوحدي ومحتاجه اوي حد جنبي
حد يبقي حاسس ان جوايا حاجات كتير مخنوقة ومش قادره اطلعها بالكلام
حد يشد مني الكلام اللي مكبوت وبيخنقني
بس هو اصلا محدش فاضي لحد ومحدش حاسس بحد ..
وحتي لو حاسس مشغول بهمومه ومشاكله .. ولو حب يتكلم عنده صحابه القريبين اللي ممكن يسمعوله
ممكن ابقي انا حد من الصحاب القريبين اللي بيسمعوا دول .. ورغم كده ميفكرش يخليني اتكلم
الكل تقريبا بيكتفي بمجرد سؤال .. مالك يا هبه .. ماليش انا كويسه
خلاص كده كله عمل اللي عليه واتطمن اني كويسه
اكيد العيب عندي انا اني مش بعرف اروح اتكلم من نفسي واقول انا جوايا كذا وكذا وكذا
بس ساعات ببقي حاسه ان اللي معايا دول مليانين مشاكل ومبحبش ازود عليهم بمشاكلي فبسكت واقول انا كويسه
ومحدش عنده استعداد يشيل مشاكل غيره .. حتي لو هيسمعها بس من غير ما يتبناها ويحاول يلاقيلها حولو
بس محدش عليه لوم غيري انا .. انا اللي غلط وانا اللي غير الناس
بس غصب عني ساعات بحتاج حد جنبي .. اي حد
لحد مااوصل للحظه اتمني فيه ماكونش انا .. اكون حد تاني بيعرف يبقي اجتماعي ويقرب من الناس ويحكي ويخرج اللي جواه
بتمني مسمعش جملة : "انتي كتومه اوي "
نفسي حد يفهم ان انا كده .. مبحبش ازود علي حد همومه فبسكت وبشيل في نفسي
نفسي حد يحس بده ويحاول يخرج السموم اللي بتتكوم جوايا
بس محدش فاضي .. ومحدش مستحمل اكتر من اللي عنده

وحيدة تماما ..

.......

هو احنا في رمضان فعلا !!!!
انا مش حاسه خالص برمضان .. مش حاسه بأي حاجه !

عادي

لما يبقي كل شئ جواك مجروح ومكسور
لما تعيش وكأنك مش عايش عشان مفيش اي حاجه حواليك بتفرحك
مفيش حاجه حواليك بقت محسوسه اصلا
كل الحاجات شبه بعضها .. وحشه
كل الحاجات وكأنها بتتعمد تجرحك اكتر واكتر وتسيبك تنزف
لما تبقي جواك آه كبيرة اوي مكتومة ومش قادر تطلعها
لما تحتاج تتكلم والكلام مش راضي يخرج
لما تحتاج تغطي ضعفك لكن غصب عنك الناس بتبقي ملاحظه
لما تحتاج حد يبقي جنبك ومتلاقيش
لما تحتاج حضن حنين يضمك ويحسسك بالأمان وبشوية حنية
لما متلاقيش كل ده
يبقي عادي ..

خبطتين في الراس توجع

الدنيا دي غريبه اوي .. و وحشه اوي
ساعات بتبقي حلوة وتضحكلك ، وانت تبقي مش مصدقها وخايف تضحكلها
واول ماتبطل تخاف وتبتدي تبتسملها تضربك علي دماغك
تفضل دماغك واجعاك وتفضل فاكر الضربه ومخاصمها ومش عاوز تكلمها تاني
و اول ماتبتدي تنسي ألم الضربه دي تبتدي تبتسملك تاني فتحن وتبتدي تقرب
عشان تتضرب تاني !
بس الضربه دي بقا مش زي الاولانيه

زي مابيقولوا فعلا ..
خبطتين في الراس توجع !

مستني إيه .. امشي
الحلم منفعشي
فوق من خيالك ..فوق
انسي بقا وأمشي
اقفل علي قلبك كفاية تجرحه
وتعلقه بحبال أماني تطوحه
من النهارده الحلم مش هيفرحه
ارجوك .. ماتحلمشي
ماتحلمشي
ماتحلمشي

طرقات - خاطرة

أنا كنت شئ وصبحت شئ ثم شئ
شوف ربنا قادر علي كل شئ
هز الشجر شواشيه ووشوشني وقال..
لابد ما يموت شئ عشان يحيا شئ

صلاح جاهين

****

طرقات .. أسير بها
لا أدري متي بدأتها ..
ولا كيف سأنهيها

****

طريق يبدأ به
أعرفه .. يعرفني
أحبه .. لا يحبني
أو يحب آخري !
أو لا يعرف ..
أو لا يريد أن يعرف
يجلس بجواري
أركز بصري عليه ..
يلتفت إليّ .. أنظر إلي الجهة الآخري
يتحدث إليّ .. إلينا جميعا
يمزح .. فأضحك .. ويضحكون
أتحدث إليه..
تتوه الكلمات .. و أسكت
يبتسم .. ويترك جواري ..
ليذهب إليها !
وينتهي بها الطريق ..

****

طريق يبدأ بها
صديقتي ..
أو هكذا تصورت !
أحدثها ..
تقاطعني !
أحكي لها ..
تقاطعني !
تحدثني بكل شئ غير مهم ..
لا أقاطعها..
أخشي أن تغضب لو قاطعتها !
تبحث بجنون عن ما يفيدها ..
أو من يفيدها !
لا ألومها .. الكل يفعل ذلك
أحببتها ..
لكن حين أتاها ..
تركتني ..
وذهبت معه !
وانتهي الطريق به ..

****

طريق يبدأ بهما ..
اراهما معا
يبتسمان ..
أبكي !
يضحكان ..
أصرخ !
لا أتحمل ..
أعود للمنزل .. أبحث بكل جنون
أجدها ..
أبتلع كل مابها بسرعه ..
وكأنهما يطارداني !
أبتسم ..وأغمض عيني
اراهما معا..
لينتهي بهما الطريق..
كما بدأ

Just a quote !

كل شئ عند العطار إلا حبني غصب

You're NOT alone

I know I didn't talk to you .. may be I'm the only one who didn't call you and say sweet words !
This isn't because I don't care !
I just wanted to give you a space .. I didn't want to push you to the edge
I know you .. words won't change anything for you.
So, I won't say sweet words .. I'll give you a space to think and recover !
Just wanted to say that You're not alone , I care about you and I love you .

أنا بقا حسيت ده معاك

من يومين كنت راكبة ميكروباص وسمعت بالصدفه اغنية لتامر حسني..بغض النظر عن اني مبحبش اسمعله خالص بس شدني كلامها
كانت بتقول :

عمرها حصلتلك دي..
تبقي لسه شايف حد وانت لسه متعرفوش ..ايوة متعرفوش
بس نفسك تجري عليه..
تحضنه وتنام في عينيه وانت لسه متعرفوش..ايوة متعرفوش

عمرها حصلتك فعلا !
انك تعرف حد ومن اول كلام بينكوا تبقي نفسك تقرب منه اوي
من اول مرة تعامل بينكوا تقول ان الحد ده هيبقي جزء اساسي من مستقبلك
مقصدش حب من اول نظرة والكلام ده عشان مش مقتنعه انه ينفع حب بالنظر بس
بس اقصد انه تبقي جواك احساس كده ان الشخص ده هيبقي مهم فعلا في حياتك
هو ده ينفع فعلا !

أنا بقا حسيت ده معاك
أنا بقا طالباني هواك
أنا بقا من يوم ما شفتك
مش متخيل غير عمري معاك

الاحساس ده علي قد ماهو حلو اوي علي قد ماهو مش طبيعي
مش طبيعي مش اقصد وحش ..بس مش طبيعي يعني غريب

انا فعلا عندي الاحساس ده اوي..رغم ان محدش بيعرف الغيب ولا حد بيعرف بكرة في ايه
بس انا بقا حسيت ده معاك !

ليه

ليه في ناس تعرفها لوقت قليل ومتنسهاش ابدا
وناس تعرفها سنين ومتسيبش فيك آثر
ليه في ناس تحبها ومتحبكش
وناس تحبك وانت مبتحبهاش
ليه لما تعوز حاجه اوي متحصلش
ولما تكره حاجه اوي تحصل